26 mai 2016

الفافيلاس




 ليلة سبت، طلبتني منية مع الثانية ليلا.
منية: الو مورو لاباس؟
المورو: لاباس الحمدوالله .. سامحني شكون معايا؟
منية: يااا فسخت نومرويا؟!
المورو: ما فسخت حد .. شكون؟ هيفاء؟ 
منية: منية معاك، جيتنا في العيد ذبحتلنا..
المورو: أهلا منية لاباس؟ امك لاباس؟
منية: لاباس .. هكا مورو تفسخ نومرويا؟!
المورو: من غير ما نكذب عليك و نقلك بدلت تليفوني و ياكا اللغة .. نومروك وقت مديتهولي في الكرهبة نسيت ما قيدتوش جملة!
منية: باهي باهي .. أمان مورو حاجتي بيك في قضية..
المورو: نشالله خير!
منية: كنت نشرب أنا و أصحابي وفات علينا البيرة، تعرفشي شكون في حومتك يبيع مارشي نوار؟
المورو: قزاز و لا كانات ؟
منية: إلي يجي!
المورو: لحظة نشوفلك شكون .. أما راو امخر وصعيب شوية.
منية: شوفلي آمان .. عيش الزين!
المورو: باهي علق طو نطلبك.
عملت اتصالاتي طلبت الجلاصي لقيت تليفونو مسكر .. طلبت فرج كفر عليا و قالي كذا و كذا منك و تكرز كي فيقتو من النوم، طلبت جلال لقيتو مازال ساهر وقالي ايجا هز آش تحب.. ياخي عاودت طلبت منية.
المورو: هاو بزهرك لقيتلك شكون، ايجا فيسع قبل ما يرقد.
منية: حومتك ما نتذكرهاش مليح..
المورو: ياخي نسيتها؟
منية: نسيتها يا مورو..
المورو: باهي اسمعني، تتذكرو الرومبوان إلي وقفونا فيه البوليسية؟
منية: اي نتذكرو..
المورو: باهي ايجا غادي طو تلقاني نستنا فيك..
منية: باهي و بربي سامحني يا مورو..
المورو: ايجا.. مبعد نتحاسبو..
لبست حوايجي ولفيت روحي ببلوزون كوير نوار وكاسكيت زرقاء في الراس وخرجت للرومبوان نتڤروح في البرد .. ما بقيتش برشا و خلطت الكرهبة متاع منية.
المورو: تنكت بالبرد .. مد شفّة نسخن بيها روحي..
منية: هههههه يا بليد! بقيت تستنى برشا؟
المورو: موش برشا هاك فيسع خلطت.. باهي امشي طول طول .. نعرف مخيبها كي توفا المونة في زك الليل..
منية: تحشالنا يا مورو وخي، جات بحذايا صاحبتي من أمريكا، ضربت حاشى عينيك عشرة بيرة و قالت هل من مزيد، بلاعة متاع شرب ههههه.
المورو: عادي الأمريكان يسطحو في الشرب ما تتفرجش في الأفلام متاعهم؟ ... دور عل اليسار ..
منية: شي قوي! ندور على اليمين؟
المورو: كمل طول .. هي آش جاية تنيك في البلاد القحبة؟
منية: كانت تعيش في تونس، كانت تقرا عربية في بورقيبة سكول، رجعت لبلادها .. عاودت جات تعمل في طلة توحشت ريحة البلاد.
المورو: ريحة البلاد يابا يابا زبلة و طحين يابا بابا .. كمل طول الدورة الجاية عل اليمين.
دخلتها للحي اللوطاني نهج الجامع، لقيت الجموع راكشة تحت الحيوط ينيكو في السبيريتو و الزطلة و يزرقو في السوبيا وكلها تتشوحر، جهرهم الضو و ما عرفوش الكرهبة ياخي دارو بيها كيف الزومبي، عملت هكا هبطت الشباك.
المورو: قطع نيكمك، قطع يا منيّك! الليلة الحومة باش تتناك الأم متاع أمها!
دونقا: واهواه آش فما؟
المورو: ربك ما فيبالكش؟
دونقا: والله لا!
المورو: 6 باقات و 16 كامبي و زوز كراهب من العدلية و زوز من التيليكوم و وحدة من ديوان التطهير زادمين على الحومة .. عادك بيهم خلطو!
دونقا: آزبي ! آزبي! ... وعلاش جايين يا زبي؟
المورو: ما فيبالكش بيا عرست؟ 
دونقا: نشالله مبروك يا ولد مارية! والله لا في بالي .. منك نسمع .. وآش مدخل الحاكم؟
المورو: تعرفهاش الطفلة هاذي شكون؟
دونقا: موش أختك نرجس ؟!
المورو: أوووه على زبي ! هاك خوروطو .. آاااه يا دونقا راك تنكت!
دونقا: آميقو براس الغالية كملّي دنوس نمشي نيك شطر من عند العتروس..
المورو: أطلع طو نمدلك..
طلع دونقا في الكرهبة، وصلناه لدارو.
المورو: هاو دنوس .. برا امشي ديراكت نيك النوم  غم على راسك و أرقد.. ما عادش تبع لفروخ .. أخطاك من الجرابع...
دونقا: Grazie mille mio caro amico.. يخليلك ميمتك..
المورو: عيشك يا دونقا، برا أرقد رتح أعصابك باش يتشوشطو.. وفك عليك من الأرطال و التقرميش مخك راهو تبعبص تناك يا دونقا!.. هيا دونقا، آميقو راهو مزروب .. أهبط قبل ما تخلط علينا العدلية..... دونقا!
دونقا:  واهوااه!
المورو: عندك خمسة لاف سلف؟
دونفا: وقتاش ترجعهالي؟
المورو: غدوة ان شاء الله!
دونقا: كلمة؟!
المورو: باهيشي!!
دونقا: لحظة نجيبلك..
منية: ياخي موش خذا من عندك دينار؟!
المورو: هاذا هو السيستام في الحومة تعطيه دينار يرجعلك خمسة لاف... بربي يا منية ناس خوروطو، ساعة أخرى ما عاد يتذكر شي! ناخوها من عندو و نرجعهالو بالتقسيط المريح خير ما يمشي ياخو بيها السم ..
خذيت من عند دونقا خمسة لاف و تعدينا لدار جلال، وقفنا الكرهبة في راس الزنقة و مشيت لقدام الدار زفرتلو، ياخي رجعلي تزفيرة، و مبعد طل عليا من البركون لابس مريول خلعة في طمبك البرد.
جلال: قداش تحب؟
المورو: كردونة.. كردونة!
عطاني اشارة الموافقة باصبع الابهام، ومشيت رجعت وقفت قدام الكرهبة.
المورو: هاي جاية السلعة.
منية: يعطيك الصحة .. مورو كيفاش تنجم تعيش فيها الحومة!
المورو: يوميا زوز شراب .. ما عجبتكش؟
منية وهي تغزر للحيوط: قول عليها Favelas في البرازيل! ديما عندكم جرايم و براكاجات؟
المورو: طو تتسمى نقصت، ما عادش كي قبل، الباندية و المجرمة الصحاح تفرقو، فيهم شكون حرق للطليان وإلي بقى في تونس شد الحبس حتى لين طاب و خرج مضعضع و منهم برشا صارتلو رسكلة ناك قدمة باهية وناك مشروع و شد باياسو .. أما الفروخ الصغار والجيل طالع جديد هوما إلي يخوفو، فروخ مسوفجة دمهم بالسوبيتاكس و الدواء، تنيكو بكف تخرجلو خنانتو من وذنيه لكن وقت يقرمش يولي عيرود ولد قحبة و يجبد السيف والحديد و عادي جدا يعمل جريمة، ما عندهاش برشا زوز فروخ أعمارهم أقل من خمستاش سنة دغرو بعضهم على خاطر طفلة..
منية: ووووه!  و دونقا شنوا حكايتو؟
المورو: دونقا عاش في بر الطليان أكثر من ثلاثين سنة، يحكي طليان خير من الطلاين، كان لاباس عليه بقدرو و يعبر،  حتى لين صوحب مرا مغربية حبها برشا لكن دمرتلو حياتو و هاك تشوف في حالتو..
منية: كيفاش دمرتهالو؟
المورو: مرة من مرات روح للدار لقاها راقدة مع صاحبها ولد بلادها، مشى ديراكت جبد السلاح باش يتيري عليه لكن المغربي سبقو و عطاه كرطوشتين وحدة في الساق وحدة في جنبو، و هو عطاهالو بين عينيه .. دونقا منع بمعجزة سي نون راهو عايش معاق، ديجا هاك تشوف فيه كيفاش يرعش بكلو..
منية: مسكين، شنوا يعمل في حياتو؟
المورو: ما عندو ما يعمل، شد الحبس و من وقت إلي روحو بيه عايش في غيبوبة وساعات كيف يتذكر حكايتو، يدخل للجامع ياخو الميكرو و يستخايل روحو موسوليني و يبدا يخطب على الشعب بالطليان والحومة الكل تسمعو، أنا نيكمها لا عمري دخلت لجامع وكيف نسمع دونقا يخطب نولي متقي و نمشي نجري نتربع قدامو ههههههه.
منية: هاهاهاهاها مالا دونقا باين فيه فينومان..
المورو: ما عندك ما ريت، يجوه الرجال الكبار بالسياسة يحبو يخرجوه، يقوللهم أنتوما عندكم الجمعة و أنا عندي باقي أيام الأسبوع .. يسكرو عليه الميكرو يتكرز، يبدا يربرب في وسط الجامع، يرجعولو الميكرو يخدم باش يسكتوه .. تسانسو بيه يعرفوه ما يبقاش برشا، نهايتها ينحي الغصّة إلي في قلبو و جواجيه و يخرج .. و كيف يبدا صاحي ياقفلهم قدام باب الجامع و في يدو دبوزة عطر متاع الباكستان و يعطر للناس إلي داخلة تصلي و يبوسهم و يطلب منهم السماح و يقوللهم خوكم موضام أمان ادعولي دعيوة خير ما تنسونيش راني خوكم.. ادعو لربي يفرج كربي..
منية: خاطرو مريض؟
المورو: عندو بنتو يحب يشوفها و عندو فلوس في ايطاليا يحب يلقالهم حل..
منية: برشا فلوس؟
المورو: ما نعرش قداش.. أما نتصور برشا .. كان يخدم في الغبرة ..
منية: صاحبك هاو جا.. مورو شد أعطيه.
المورو: جليّل يا باهي، يعطيك الصحة، باش نسميك Jalel Urgence مفتوح 24 على 24 ..
جلال: هاهاهاها آع ولد مارية ماشي تبرتف؟
المورو: والله لا، سلعتك ماشية للآميريك، وخوك ماشي باش يتحشى في الغطاء كيف كعبة البريك..
جلال: مالا سايس روحك، أختي الدار هاك تعرفها كي تستحق ايجا ديراكت لخوك جليّل في أي وقت و سلملي على الأميريك و سيرتو سيلفستر أستالون قلو جليّل و كافة أهالي حي البعابصية يبلغولك تحياتهم و سلامهم الحار، لو كان يحب يعمل فيلم في الحومة مرحبا بيه نمثلو معاه بلاش، عندنا الماعون الكل، سكاكن سواتر، سيوفة، داربيجي، رشاسات .. يحب دبابة نجيبولو دبابة .. ماتريال و ماعون الحرب الكل عندنا ! ريتو يا مورو في رامبو كيفاش عطاه كرطوشة ديراكت في الراس؟! خلي كي يبدا يتلاطخ! باباب باباب...
المورو: هيا جليّل من غير ما تنفخهملنا و تبدا توري فينا في ابداعاتك القتالية .. الطفلة ما عادش عليها بكري، طيارتها قريب تخرج!

خرجنا من عند جلال و رجعنا تعدينا على نهج الجامع لقيناها ماكلة بعضها حس وعياط و حبيب كونياك جابد ساتور يضرب في باب دار عزوز العصافري.. وقفنا الكرهبة بعيد شوية، وصيت منية باش تقعد فيها و تسكر البيبان و اذا تتاكت تخدم و تنده، ياخي شدت الصحيح باش تهبط معايا تحب تتفرج في العركة!

المورو: آش فما يا زبي؟!!
كالاتوسة: عزوز الميبون خرج سبنا و ضرب الحبيب بميزاب بلاستيك!
المورو: وعلاش يضرب فيه؟!
كالاتوسة: ماك تعرف الحبيب كي يبدا شايخ يشرقع المسجلة بالقوي ..
المورو: الحبيب راسو كلو بالدم!!
كالاتوسة: ناكو بميزاب!
المورو:  لا حول ولا قوة الا بالله! آش باش يفضها!!

نحن هكاكا و زدمت كراهب الحاكم و هبطو البوليسية يبنيكو فيها على بعضها بالزلاط و إلي يشدوه ينيك طريحة و يطلعوه للباقا! شديت منية من يدها و هزيتها باش نهربو.. لقيت أقرب بلاصة هي الميضة متاع الجامع، نكت الباب بمشطة خلعتو و دخلنا و زادو خلطو علينا أولاد الحومة.. نحن هكاكا لابدين و يتكلم الحبيب كونياك.
الحبيب: آاااه ما أبنها الريحة! موش ريحة أنثى؟
منية خايفة: شكونو هذا؟
المورو: يا حبيب أسكت نيّك لا تفضحنا .. أصصصص!!
الحبيب: المورو ولد مارية؟! آش تعمل هنا؟!
المورو: نعن زبور خالتك خالط على زبوبنا حتى للميضة!!
الحبيب: شكوني الطريدة إلي معاك؟
المورو: أمك القحبة.. أسكت بلّع فمك! الحاكم مازال يدور!!
كالاتوسة يطل من شقوق الباب: شدّوه شدّوه!
المورو: شكون شدّو؟
كالاتوسة: سمير ولد السبانيورية.. آآي أأي!! ناكولو أمو بالضرب!!
الحبيب: يا كالاتوسة طيش سيقارو..
المورو: الله يهديك يا حبيب! علاش ما استنيتش يطلع النهار و نكتلو أمو؟!
الحبيب: قاتلو قاتلو الليلة و لا غدوة!
المورو: رد بالك تمشي للسبيطار، باز باش يحطوك في recherche.. مبعد روّح حط عليها طرف بن و امشي لعزدين التارزي يخيطهالك..
الحبيب: والله و راس ديربو الا ما نقبة صرمو ما نخيطهالو!
المورو: هاهاهاهاهاها نعن زيور خالتك يا حبيب .. باش تقتل زبي بالضحك!!
الحبيب: هو إلي خبّر الحاكم .. الميبون!
كالاتوسة: حبّوب غدوة الصباح امشي للمركز و خوذ تسخير و أعمل سرتافيكا .. و قوللهم كنت نخدم و مروح ياخي عزوز اعتدى عليّا بالعنف و نحن نشهدو معاك!
المورو: و أنتوما آش قاعدين تنيكو تحت حيط دارو في زك الليل؟ فرقة نحاسية تخدمو في التشريفات؟ أبسط حاجة يعدوكم تحليل كل واحد فيكم ينيك عام بالمرتاح! كان تعرف شكون برا جعّلو طو يخدملك بحثك و ينتهى الموضوع، بالعكس أنت هو المتضرر .. تنجم تحشيهالو!
الحبيب: ما يفضهالي كان الباشا!
المورو: ايه الباشا نسيتو! أما يلزمك تفرح بيه!!
منية: شكون الباشا؟
المورو: ولد حومتنا يخدم في brigade.
الحبيب: بنت من هاذي؟؟
المورو: ماهباش من الحومة، جات ضيفة، هاكم فرحتو بيها و بيتوها في الريحة المنيكة!!
منية: محلاها الميضة و محلاها حومتكم!!
المورو: يحلي أيامك! جايبك معايا توريست؟
الحبيب: يا مورو براس مارية، ما تعرفش بوحميد آش عمل في ياكا القضية؟
المورو: والله ما نعرف! ماكش تقابل فيه؟
الحبيب: نكلمو ما يهزش، نمشيلو للدار يخرجلي بوه يقولي موش هنا .. حتى القهوة ما يقعدش فيها!
المورو: العشية بركا ريتو واقف عند الموالحي، حضرتلو الاوراق؟
الحبيب: عطيتهملو الأوراق و عطيتو ميتين ألف و جابلي badge و على أساس كي ندخل نخدم نكملو الباقي!
المورو: هههههههه
الحبيب: شبيك تضحك؟
المورو: شي شي!
الحبيب: حشاهالي بوحميد؟!
المورو: باش يحشيها للحبيب كونياك! طو هذا كلام!
الحبيب: ياخي فاش يخدم؟
المورو: يبيع في الريح للمراكب ههههههه.
الحبيب: ولد مارية مانيش ناقص! راو عادي جدا نفرتلو كرشو و عينيه نغزر!!
المورو: من غير غش! جابلك badge؟ آكاهو أمورك ستة زيت ما تفوتش شهر و تدخل تخدم في البورط! ماك تعرف البورط موش ساهل، العباد تستنى بعشرات السنين باش يدخلو يخدمو فيه!
الحبيب: معناها باش ندخل نخدم الا بعد ما يهز ربي امانتو، نمشي هيكل عظمي؟؟
المورو: انشالله قبل! المرة فاتت حكالي قالي والله الحبيب كونياك بطّال و غايضني و باش يعمل المستحيل باش يدخلك تخدم! السيد باش يزيد يدفع من جيبو و باش يخاطر بمستقبلو على خاطرك !!
الحبيب: برا يرحم والديك و والديه!
المورو: كالاتوسة .. المكان آمن؟
كالاتوسة: مشاو من بكري!
المورو: كي يطلع النهار ما تنساش تكلّم الباشا يفضلك مشكلتك!

خرجنا من الميضة ياخي عرضتنا نعيمة بارفان لابسة روبة حمراء للركبة و كبوط فورير وشعرها مسيّب و ماكياجها complet و هي تتطايح و اتطقطق في صباطها في زنقة علولو.
المورو: ربي يعين النساء!
نعيمة: عندك شعول؟
المورو: ايجا شعّل!
نعيمة: هاهاه أنا نجيك؟! أنت تجيني!
المورو: ديزولي ma belle مانيش طايح من السلوم..
نعيمة: موش لازم، خلي عندك شعولك!

وتعمل هكّا اتطيح و تتصبط كاليس، مشيت هزيتها قعدتها على ترعة دار فريحة.
المورو: نعيمة لاباس؟؟
منية: جيبلها دبوزة ماء فيقها!
المورو: منين باش نجيبلها الماء؟! شد معايا نروحو بيها لدارها..
هزيناها لدارها، دقينا الباب ياخي بوها عم قدّور كان يتوضى جا حللنا.
قدور: شبيها شبيها؟؟
المورو: كانت تمشي، طاحت ما في عينها بلّة! هز عم قدور دخلها معايا.
دخلناها لبيتها و رقدناها على الفرش، رشّيناها بطرف ماء ياخي بدات تفيق..
المورو: باين فيك شربت برشا !
نعيمة: راسي نحس فيه بكلّو يدور ..
منية: اتّكى ارتاح .. مد ساقيك أطلقهم..
قدور: وين حطيتوه صاكها؟
المورو: منية موش عندك؟
منية: اهاوكا فوق الكرسي.

مشى قدور هز الصاك حلّو، جبد منو الفلوس و رجعو لبلاصتو.
المورو: عم قدور هايكا بحذاك، نحن يلزمنا نمشيو.
قدور: يرحم والديكم و سامحونا على القلق!
المورو: تشاو.

خرجت مع منية وصلتها للكياس الرئيسي، جيت باش نهبط شدتني من يدي.
منية: وين ماشي؟ امشي معايا نعملو كعبات ومبعد روح..
المورو: آش مهزني؟
منية: والله وحدنا، أنا و جينيفار و ريم.. فايزة في باريس عندها نهارين، ايجا معانا نعملو ضحكة نشيخو على الأمريكية!
المورو: لا يا بنتي آش مهزني لدار فيها بنات وحدهم؟!
منية: موش قلت حسيتها كيف داركم و رتحت فيها ولا تحشي فيه؟
المورو: ايه صحيح، اما موش الوقت هذا!
منية: هيا مورو آمانك نعملو ضحكة و مبعد نوصلك حتى لباب الدار.. هيا البنات يستناو فينا راهم رقدو!
المورو: هيا..

مشينا للدار، دوب ما دخلنا نسمعو في صوت الموزيكا زايطة و البنات خوروطو يغنو في كاراوكي و شعوراتهم مشبشبة قول كانو يشطحو في النوبة متاع صلاح مصباح... مشات منية حطت البيرة في الكونجيلاتار و أنا دخلت ديراكت نعض في شفايفي و نلوي في حزامي فزاني على غناية what a wonderful world متاع لويس أرمسترونغ .
المورو: يا هلا الله .. وآش هالليلة يا دليلة .. ooh my god..  what a wonderful night Dalila.
والبنات كيخ كيخ بالضحك، ريم جات تجري تعنق فيا و هي تعيط..
ريم: الموووووروو .. والله توحشتك..
المورو: الحمدوالله قابلتك مرة على ذبيحة علوش و دمومات!!.. مالا لو كان قابلتني لابس سترينغ أقحواني آش يصير فيك؟! هاهاهاها..
ريم: هاهاهاهاهاها بلييييد .. بليد .. بليد! هكا طفيتنا و ما تسألش علينا يا خايب؟!!!
المورو: بالشوية عرفني على your friend!
ريم: جينيفار from Texas..
المورو: I'm El Moro from El B3absia City.
جينيفار: نتشرفو الـ مورو..
المورو: do you speak Arabic؟
جينيفار: of course عشت في تونس حمسة سنين!
المورو:  do you know what does mean نيكني يا داود كان مازلت نعاود؟
ريم: ههههههههه يهلكك يا المورو سيّب الطفلة ما تعلمهاش الكلام القباحة!!
المورو: عاشت خمسة سنين في تونس و ما عمرها ما سمعت كلمة زايدة طايشة؟ هذا اذا ما هياش تورور بالعصبة وبرا نيك أمك هههههههه، هاك تشوف فيهم في الأفلام كلمة fuck ديما تخيط على لسانهم!
جينيفار: your friend is so cute..
منية: يا يومبك على مورو ! قاتلك so cute .. شكون كيفك!
المورو: تصدق أول مرة نحشم على روحي!
منية: ههههههه أنت تحشم!! إلي حشمو ماتو .. هيا اقعدو .. ما جعتوش؟؟

قعدنا على الطاولة، حطتلنا منية بريك دندوني و سلايط و لازانيا.
ريم: مورو احكيلنا آش عندك جديد؟
المورو: شي كالعادة .. لا جديد يذكر.. ندزو في العجلة بالسيف و الحمدالله مازلنا نتنفسو..
منية: تعرف مورو، بالرغم هاك ضحاك و صاحب جو و لكن كي تسكت قداش يبان على ملامحك.. ما نعرش .. كيفاش نفسرلك!
المورو: هههههه نخوف؟
منية: لا ما نشوفكش تخوف، أما نحسك عندك حزن دخلاني.. غموض .. ما نعرش درا كيفاش تبان لي!
المورو: سي نورمال هاك شفتني وين عايش؟ ديجا هاك قلت في الفافيلاس .. لا تكن لينا فتعصر و لا تكن صلبا فتكسر.. يلزم ملامحي فيهم بعض العنف ههههه... نعرف روحي وجهي خايب... الله غالب سماتهم على وجوههم..
منية: يا حسرة عليك! صاحبي زبور يشوي.. باز راك مهبلهم بنات حومتك!
المورو: شكون؟ فوزية بوبز؟ شدلية حلالم؟ نعيمة بارفان؟ هاذوما باش نهبلهم؟! نيكمها يلعبو بالعالم بين يديهم!
ريم: يخوفو بنات حومتك؟
المورو: ماهومش بنات! وحوش ضارية! حيوانات لاحمة و يا حليلو الزوالي إلي يطيح بين يديهم!
منية: زعمة هذا الكل ما فيهمش وحدة باهية وعاقلة؟
المورو: آش باش نقولك؟! العاقل في البقر نطاح! أما بصراحة ناس زواولة حلو عينيهم لقاو رواحهم عايشين في محيط يفرض عليهم شخصية معينة باش ينجمو يسلكوها..
منية: ريم عيّش الزين، جيبلنا البيرة، هايكا في كونجيبلاتار راهي بردت.. 
المورو: يسترك و ينوب عليك يا ريم!
ريم: عيشو papa..
منية: علاش نحسك مختلف؟ بكري شفتك كيفاش وصلت دونقا ولد حومتك لدارو وقتلو برا أرقد و ما يتبعش الفروخ..
المورو: نعطيك معلومة؟ برشا اولاد من الحومة ما ينجموش يخرجو منها، طلع علاش؟ tout simplement  لو كان يبعد يطيح manque  و يلزمو يبدا ديما قريب من البياعة متاع الدواء و الزرارق.. cheers .. و باش نرجع لسؤالك علاش انا مختلف عليهم؟ أنا خرجت من الحومة قريت بعيد عليها و بعدت عن محيطهم و أكثر الوقت نتهومل و كل مرة في بلاصة و نخالط في ناس جدد و كل مرة ناخو معلومة جديدة و نتبع و نقرا و نتبع الأخبار و نحاول نلهي روحي كل مرة بحاجة .. و ما نكذبش عليك جربت كل شي .. حتى من الكوكايين جربتو، أما لكن ما طحتش في piége كيفهم! موش خاطرني أذكى منهم، بالعكس هوما أذكى، أما لكن نستعرف بروحي منيّك ماديا و جبان موش كيفهم و ثانيا نحلم نحب نعيش و هوما ما عندهم شي باش يحلمو يعيشو على خاطرو... ناس فاقدة الامل و الحلم، ناس عايشة في تركينة، عايشين في غيبوبة.. و الدولة موش مفكرة فيهم و باعثتهم ينيكو.. أصلا ما عندهم حتى انشطة ثقافية خلاف الرامي و النوفي .. ناس ما عندهاش فكرة آش فمّا خارج المحيط إلي عايشين فيه...
منية: دونقا موش كان عايش في الطليان و سافر و شاف بلاد أخرى!
المورو: نقولك حاجة مثلا في سيسيليا و نابولي و برشا بلايص في طاليا، في الحوم متاع العرب كي تبدا تحوس فيها عبارة تحوس في الجبل لحمر و الملاسين، تسمع بومزيود يشرقع و الكانون قدام دار يشعل .. عايشين نفس التفاصيل متاع حومة شعبية في تونس! كيف كيف إلي يحرق وين باش يتخبى؟ ماو بحذا صاحبو .. ولد حومتو .. واحد يقربلو .. باش يعيش متقوقع من جديد في وسط القبيلة و العشيرة نفسها و ما عندوش حتى استعداد باش يتأقلم في البلاد إلي عايش فيها و لا يستعرف بقوانينها و نظامها و طبيعة مجتمعها! دونك موش باش يتبدل شي! هاك تشوف فيهم وقت يروحو في الصيف؟ ههههههه قول انت منين باش تشوفهم ؟! هههههه
منية: فهمتك مورو، ما تحبش تخرج تعيش لبرا؟
غزرت لجينيفار و قلتلها: of course  نحب ههههههه.. نفدلك أما ما نجمش! أمي و اختيما نجمش نخليهم..
منية: نشالله ربي يفضلهملك!
المورو: عيشك و يفضلك فايزة و صاحباتك الباهين!
جينيفار: المورو تحب تجي حذايا لأمريكا مرحبا بيك any time!
المورو: هههههه طو بعد ما قلت ما نحبش نمشي، تستدعى فيا؟! ههههههه.
جينيفار: اوووه المورو مانيش نبدلك .. ما نيش نفدلك.. you re welcome.
ريم: هيا هز أمك و أختك و قطع معانا لأمريكا!
المورو: ما أسهلها! .. باش نقولكم على حاجة تعجبني في أمريكا .. وقت قريت الشيمي تعلمت وقت يتحد الهيدروجين مع الاوكسيجان يعطونا الماء، و علمتني أمريكا وقت يتحد الصيني و الايطالي و الهندي و البنغالي و الدانماركي والايرلاندي  و المكسيكي و المسيحي و اليهودي و السيخي و مختلف الأجناس و العرقيات بعطونا أقوى دولة في العالم و تعرفو العرب و المسلمون  آش علموني؟ كان فتاوى التكفير و القتل في بعضهم رغم انهم عندهم نفس الدين و يتكلمو نفس اللغة! ناس قوتهم في اختلافهم و ناس أخرى ضعفهم في تشابهم.. هاو شيعة و هاو سنة ..  هاو ساحلي و هاو جندوبي .. و كلهم غاطسين في نفس الخراء حاشاكم!
منية: والله شي يأسف ...
ريم: أتفق العرب أن لا يتفقو..
المورو: يتفقو و لا يدهم لبعيدة.. (كملت قلبت كانات البيرة) برا عيش بنتي جيبلنا البربر.. خف روحك عاد! جينا باش نضحكو و نتفرهدو و لا ندوروها مقهى ثقافي؟!
منية: عندكش نكتة؟
المورو: آش من نكتة؟! ما عادش نتذكر شي!
منية: ايجا نغنو كاراوكي.. شنوا الغناية تحب نحطهالك؟
المورو: حط الشيخ نعام..
منية: شكووون ؟؟!
المورو: الشيخ نعام .. القرعة و الكاس ..
منية: شكونو هذا؟ شيخ متاع جامع؟
المورو: القرعة و الكاس .. ديما نعمر الراس.. شيخ متاع جامع يغني على الشراب؟
منية: هاك قلت شيخ!
المورو: فما انواع في المشيخة و كل واحد فاش شيختو!
منية: منين باش نجيبو الشيخ طبالة؟
المورو: لو كان جا في بالي راني جبت الكاساتات متاعو !
منية: المرة الجاية نشالله! هيا نحفلوها بومزيود.. شوف جينيفار كيفاش تبدا تلوي هههههه.
المورو: قداش الوقت طو؟ يا زبي النهار طلع! عندي نصبة متاع شلايك يلزمني نمشي و لا الصانع ينيكهالي!
منية: من غير ما تدخل بعضك! لحظة طو نوصلك..




2 comments :

Enregistrer un commentaire

AddThis